Það er að vanda æfing á laugardagsmorgun í Risanum klukkan 10:30. Æfingin byrjar á hlaupabraut F.H. þar sem við tökum nokkra snúninga og horfum á Boot Camp liðið gráta við hliðina á okkur. Svo verður farið inn í Risa í klukkutíma fóbó. Melda sig í athugasemdum.

Á mánudaginn er svo leikur gegn 1. deildarliði Selfoss á Selfossi. Leikurinn hefst klukkan 19:00 og mæting í hnakkabæinn 18:15. Það er því ágætt að menn rotti sig saman í bíla á æfingunni á laugardag renni þetta í samfloti. Við erum svona 40-50 mínútur á Selfoss og því ráðlagt að menn leggi í síðasta lagi af stað klukkan 17:30.

Þarna erum við náttúrulega að keppa við lið sem lenti í 3. sæti í 1. deildinni í fyrra og því nauðsynlegt að allir séu klárir í verkefnið. Verðum að vera með stóran hóp og hausinn í lagi. Gott að melda sig með ástæðu ef menn komast ekki í þetta verkefni.

Æfing í kvöld á Ásvöllum klukkan 21:00, melda sig í athugasemdum.

Á sunnudaginn mættum við blendingsliði úr röðum Hattar, Dalvíkur og slæðingur af öðrum austanmönnum að ég held. Veður til knattsparks var allt hið besta og leikurinn bara nokkuð góður.

Við stilltum upp í 4-5-1.

Í fyrri hálfleik spiluðum við vörnina vel og gáfum fá færi á okkur en vorum hins vegar nokkuð geldir sóknarlega. Bæði sóttum við á fáum mönnum auk þess sem hreyfanleikinn var lítill á liðinu. Framan af var þetta því nokkuð rólegt í færum talið en spilamennskan ágæt.

Seinni hálfleikurinn var opnari og komumst við fyrstir á blað með góðu marki. Bjarni Þ sendi þá langan bolta fram, beint á kollinn á nafna sínum Pálmasyni sem flikkaði honum inn fyrir vörnina. Þar var Nonni mættur og lyfti boltanum skemmtilega yfir markvörð Hattar. 1-0.

Við duttum hins vegar strax í kæruleysi og fengum á okkur mark um mínútu síðar. Þá rataði stungusending á óskiljanlegan hátt fram hjá 3-4 leikmönnum þar sem leikmaður Hattar mætti og slúttaði í hornið. 1-1.

Um 10 mín síðar komst Höttur í 2-1 eftir að dæmd hafði verið vítaspyrna fyrir tiltölulega saklaust brot. Í þessari stöðu misstum við aðeins varnarskipulagið og menn voru seinir til baka. Við áttum ágætis sóknir án þess að skora þar til á síðustu mínútum leiksins að við fengum víti fyrir svipað saklaust brot og var það Daði Kristjánsson sem lagði boltann smekklega í netið og jafnaði leikinn. 2-2.

Heilt yfir alveg ágætis leikur og helst hægt að finna að því að menn duttu aðeins úr skipulagi síðustu 20 mín. Hattarliðið var með sterka leikmenn innanborðs og á svipuðu leveli og bæði Reynir og Grótta sem við höfum spilað við upp á síðkastið. Það er því góður gangur á þessu og verðugt verkefni í næstu viku þegar við mætum Selfoss, sem var einmitt mjög nálægt því að fara upp í Úrvalsdeild á síðasta tímabili.

Það er því um að gera að mæta vel á æfingarnar sem eru framundan og vera í standi til þess að takast á við sterkari lið. Veðrið er líka búið að leika við okkur á síðustu skipti og því vonandi að frostæfingunum sé að ljúka.

Það er gleðilegt að sjá að frostið er í rénun á höfuðborgarsvæðinu og því ættu menn að geta notið þess aðeins meira að taka á því á æfingum. Það er líka vonandi að menn losni við veikindi sem hafa verið að hrjá mannskapinn.

Reynum að fjölmenna!

Þá er komið að fjórða leik undirbúningstímabilsins.

Mæting: 17:45
Leiktími: 18:30
Leikvöllur: Gróttuvöllur
Andstæðingur: Grótta

Það eiga að vera klefar í boði en menn taka með sér sokka og (stutt)buxur sjálfir. Treyjurnar verða svo á svæðinu.

Við gerðum vægast sagt í buxurnar á laugardaginn gegn Reyni, þar sem undirritaður fór fyrir hópnum í góðgerðarstarfsemi í þágu andstæðinganna. Það þýðir hins vegar ekkert að væla yfir því heldur gyrða sig í brók, mæta vel á æfingar og vera klárir í leikinn á miðvikudaginn.

Að vanda er æfing í dag (mánudag) klukkan 21:00 og á morgun klukkan 21:30. Á miðvikudaginn verður svo spilað við Gróttu á nesinu og menn geta því farið að gíra sig fyrir þann leik.

Látið vita með mætingu í athugasemdunum.

Að vanda er æfing í kvöld (fimmtudag) klukkan 21:00 á Ásvöllum. Á laugardag fer svo fram þriðji æfingaleikur tímabilsins þar sem við mætum Reyni Sandgerði í Reykjaneshöllinni.

Meldum okkur með mætingu og fjarvistir.

Það var fín mæting á æfingu í gær þrátt fyrir stinningskulda og er það jákvætt fyrir framhaldið. Nú er bara að fylgja þessu eftir og fá góða mætingu í Risann í kvöld. Æfingin byrjar klukkan 21:30 með upphitun á hlaupabrautinni hjá FH og svo förum við í bolta inn í Risanum.

Meldum okkur í athugasemdunum.

Ég sá því miður ekki leikinn á laugardag gegn KFG en er búinn að fá ágætis lýsingu á þessu. Við vorum víst ekki að spila neitt sérstaklega og vorum 1-0 undir í hálfleik. Í seinni hálfleik var skipt úr 4-5-1 í 4-4-2 og það skilaði sér með tveimur mörkum frá Binna og Bjössa og lokatölur því 2-1 sigur. Það er náttúrulega klárlega jákvætt að fá sigur úr leiknum og einnig mikilvægt að menn noti æfingaleikina til þess að svitna vel og koma sér í leikform. Það tekur alltaf smá tíma að venjast nýjum meðspilurum og breyttum áherslum og nú er bara að byggja á þessum sigri í næsta leik sem verður gegn Reyni Sandgerði í Reykjaneshöllinni næsta laugardag.

Annars er æfingaprógramið óbreytt og því æfing klukkan 21:00 á Ásvöllum í kvöld. Um að gera að melda sig á síðunni og láta vita með fjarvistir.